Íslandsmeistaramótið í Carcassonne 2026
Þann 30. maí síðastliðinn héldum við Íslandsmeistaramótið í Carcassonne í Spilavinum. Aldrei hafa fleiri þátttakendur skráð sig til leiks, en mótið var fullsetið. Að auki tók Belgíumeistarinn í Carcassonne þátt, sem kallaði á umræður hjá mótshöldurum um hvernig ætti að tækla sigur hans ef svo bæri undir. Til að gera langa sögu stutta þá ákvað Belginn sjálfur að stíga til hliðar eftir fyrstu fjóra leikina og gaf þar með sætið sitt í undanúrslitum. Sú ákvörðun lýsir vel drenglyndinu og gleðinni sem ríkti á milli allra keppenda — og áhorfenda, því nokkrir áhugasamir áhorfendur völdu að spila Carcassonne á meðan þau fylgdust með mótinu, og þiggja leiðsögn og Masterclass kennslu í Carcassonne frá belgíska meistaranum.
Þátttakendur úr öllum áttum
Þátttakendur í mótinu voru ekki eingöngu núverandi og fyrrum meistarar í Carcassonne. Meðal þátttakenda var fólk sem spilar Carcassonne sem hobbí — og einn þátttakenda hafði aldrei spilað upprunalegu útgáfuna nema á Board Game Arena (BGA), sem er vefur þar sem hægt er að spila fjöldamörg borðspil við fólk um allan heim.
Íslandsmeistarinn sleginn út
Mótið var gífurlega spennandi, og réðust sumir sigrar á aðeins einu stigi. Þar á meðal var sigur Guðrúnar Ýr Skúladóttur á bræðrunum Stefáni og Narfa Jónssonum — en Stefán er margfaldur Íslandsmeistari í Carcassonne og sigraði í fyrra. Stefán náði í undanúrslit en þurfti að sætta sig við að keppa um (og sigra) þriðja sætið.
Í fyrsta sinn á mótinu — á úrslitaborðinu!
Á úrslitaborðinu voru tveir nýir keppendur sem höfðu aldrei tekið þátt í mótinu áður: Þar kepptu Guðrún Ýr og Eyrún Halla Kristjánsdóttir — en hún hafði einmitt aðeins spilað Carcassonne á BGA. Borðið var umkringt þátttakendum í mótinu og áhorfendum, og var úrslitunum fagnað af öllum í húsinu. Svo varð að Eyrún Halla sigraði mótið og er nýkrýndur Íslandsmeistari í Carcassonne, og óskum við henni innilega til hamingju með titilinn.
Næstu mót og viðburðir á laugardögum
Næsta mót sem við höldum í Spilavinum er Íslandsmeistaramótið í Dominion, sem verður haldið þann 13. júní næstkomandi. Glöggir lesendur sjá að það verður líka á laugardegi, en við erum að prófa okkur áfram með að halda viðburði á laugardögum sem og fimmtudögum eins og áður. Aðrir nýir viðburðir á laugardögum eru Fjölskylduspilastund og Blood on the Clocktower, sem er núna haldið tvisvar í mánuði vegna gífurlega góðrar þátttöku.
