Létt og skemmtilegt spil fyrir alla fjölskylduna þar sem falinn hlutur leynist á bak við hverja mynd. Minnir svolítið á Tvennu, nema að hvert spil er lítil saga sem gaman er að skoða og uppgötva hlutina á myndinni. Pictoo tekur ekki mikið pláss á borði, svo að það er jafnvel hægt að spila það í flugvél (við myndum þá fækka spilum per leikmann úr 5 í 4 til að spara borðplássið).

Stokkið spilin. Hvert spil er með mynd á annarri hliðinni og einhvern hlut á hinni.
Gefðu fimm spil á mann, og setjið spilin fyrir framan hvert ykkar þannig að litríka myndin sjáist..
Setjið afganginn af spilunum í bunka á borðið og snúið hliðinni með einum hlut upp.
Nú skoðið þið spilin ykkar vel og reynið að finna hlutinn sem er efst á bunkanum á ykkar spilum. Þegar það tekst, þá segið þið það upphátt og sýnið hlutinn á spilinu ykkar. Svo setjið þið spilið ykkar efst á bunkann, og þá er komin ný mynd til að leita að. Það ykkar sem fyrst losnar við öll spilin sín sigrar.

Athugið að myndirnar á spilunum eru ekki alltaf nákvæmlega eins og myndin sem ræður því hverju er verið að leita að. Til dæmis geta kettir verið af ólíkum tegundum og litir á blöðrum mismunandi.

Þó spilið þoli marga leikmenn, þá mælum við með að halda fjöldanum lágum fyrir yngstu leikmennina.

Pictoo er líka til sem Pictoo: Disney, og Pictoo: Ævintýri.