Litla nornin (Hexe Tier …)

Einfalt og skemmtilegt spil sem heitir löngu nafni á upprunatungumálinu, eða Hexe, Tier … wer fehlt denn hier?.

Til að hefja leikinn í Litlu norninni, þá skiptir þú spilunum á milli leikmanna, og hver þeirra leggur þau fyrir framan sig og lætur þau snúa upp. Á hverju spili er mynd af norn sem flýgur á kústskafti, með einu eða fleirum dýrum sem fylgja henni.

Þegar þú átt leik, þá kastar þú báðum teningunum, sem sýna mismunandi dýr. Ef mismunandi dýr koma upp á teningunum, þá á hver leikmaður að snúa á grúfu öllum spilum sem sýna bæði dýrin. Ef sama dýrið er á báðum teningunum, þá nægir að finna það dýr á spilinu til að snúa því á grúfu. Leikmaðurinn sem fyrstur snýr öllum spilunum sínum á grúfu vinnur umferðina, og fær að launum öll spilin sem enn snúa upp hjá öðrum leikmönnum. Ef tveir eða fleiri klára á sama tíma, þá deila þeir spilunum jafnt á milli sín og setja afganginn í kassann ef einhver er.

Þá snúa leikmenn öllum spilunum sínum upp á ný og næsta umferð hefst. Að þremur umferðum liðnum er það leikmaðurinn sem er með flest spil sem vinnur.